Den kuratoriske ambisjonen har vore å lage eit kunstverk som går i dialog med verksemda til Kartverket og arkitekturen til bygget. Som ein stadspesifikk installasjon er kunstverket integrert i omgjevnadene, og aktiverer rommet med nye perspektiv og forbindelsar.
Kunstprosjektet tar utgangspunkt i dei karakteristiske søylene i rommet. Som skulpturelle element fungerer søylene som berarar av det visuelle og konseptuelle innhaldet til kunstverket. Gjennom dei utforskar Kouyoumdjian korleis vi orienterer oss i verda både fysisk og mentalt.
Ved å omarbeide element frå kartlegging, som geometri, linjer, forhold og projeksjonar, har kunstnaren skapt eit visuelt språk som er overført til overflatene til søylene. Geometriske fliser med harde linjer møter mjuke gardiner med handsydde sirklar og ovale former. Kunstverket peikar ikkje berre mot taktile kontrastar, men også mot kartprojeksjonane Gall–Peters og Mercator og den ekvirektangulære projeksjonen.
Projeksjonane overfører den tredimensjonale, krumme overflata til jordkloden til eit todimensjonalt kart, noko som fører til at forma, størrelsen, avstanden eller retninga blir forvrengd. Dette peikar mot det grunnleggande paradokset i kartlegging: Alle kart forsøker å skildre verda så nøyaktig som mogleg, men er samtidig ei tolking der informasjon går tapt eller blir forvrengd.
Arek Kouyoumdjian (f. 1993) arbeider i skjeringspunktet mellom fotografi, måleri, skulptur og teikning. Kunstnaren har eit visuelt språk prega av enkle, geometriske former, ofte firkantar som dannar eit slags metaspråk mellom innhald og landskap. Han evnar å tematisere komplekse strukturar og samanhengar i stadspesifikke kunstinstallasjonar.
The square that dreamt to be a circle er laga spesielt for den renoverte E-blokka til Kartverket i Hønefoss. Her inngår verket i ei større kunstsamling med arbeid av mellom andre Esther Maria Bjørneboe, Taryn Simon og Mona Hatoum.
