Historjá vender nordover

Eit av dei mest kjende kunstverka frå KORO si samling, er det 24 meter lange tekstilarbeidet Historjá, av Britta Marakatt-Labba. Verket heng til vanleg hos UiT i Tromsø.  Etter å ha vore på utlån i nærare to år, skal verket snart få komma tilbake til Tromsø igjen. Men fyrst skal også befolkninga i Bodø få oppleva kunstverket på nært hald.
 

Historja (2007) vart laga på oppdrag til UiT Noregs arktiske universitet og hatt den faste veggplassen sin i Tromsø saman med stadig nye generasjonar av studentar og tilsette. Verket vart lånt ut til Nasjonalmuseet si store retrospektive utstilling med Marakatt-Labba, Bastilis sákkaldagat / Sylkvasse sting i 2024, saman med fire andre tekstilarbeid frå KORO si samling på UiT. Ferda gjekk vidare til Sverige og Konstmuseet Norr i Kiruna, og Moderna Museet i Stockholm.  Før desse utstillingane blei verket og vist på Ddocumenta 14 i Kassel i 2017, ein av dei største internasjonale arenaene for samtidskunst. Utstillinga hadde eit stort fokus på kunst frå Sápmi og markerte Marakatt-Labba sitt store internasjonale gjennombrot.

No skal Historjá visast på Nordnorsk Kunstmuseum i Bodø for fyrste gong, og det blir markert med opning torsdag 30. april. Les meir om det og formidlingsprogrammet på NNKM si nettside.

– Me er så klart stolte og glade over at Historjá rører ved så mange menneske, seier KORO-direktør Karianne Kampevold Sætre om den store interessa for dette kunstverket. – Det viser at kunstopplevingar kan bety noko særskilt for folk. Generelt opplever vi stor interesse for arbeida av samiske kunstnarar. 

– Vi forsøker å leggje til rette for at så mange som mogleg skal få høve til å få sjå Historjá, og set stor pris på samarbeidet med Nordnorsk kunstmuseum om visninga i Bodø. Samstundes er det jo slik at verket blei laga for UiT, som naturleg nok saknar originalen, og både universitetet og vi i KORO gler oss over at verket er på veg nordover igjen, seier Kampevold Sætre.