Lokalane til NAV Arbeid og ytingar i Kristiansund var i utgangspunktet ikkje offentleg eksponerte område, men NAV sjølv viste stor interesse for kva kunst kan gjere for arbeidsplassen. Det var òg eit ønske om å opne bygget for publikum og med det gjere kunsten og bygget tilgjengeleg.
Dei tre kunstnarane Herman Mbamba, Mette Stausland og Wendimagegn Belete blei valde til prosjektet. Bileta deira består av komposisjonar som frå ulike ståstader tek utgangspunkt i ei undersøking av forholdet mellom tid, rytme, rørsle og spor av minne. Samanstillinga av dei tre kunstnarskapa ville opne opp for ei undersøking rundt kva betydning både personleg og kollektiv erindring har for forståing av identitet og kultur. Kunstnarane inviterer oss til å utforske våre eige forhold til fortida og til korleis den formar deira notid og framtid.
Dei valde kunstverka har både samla og kvar for seg ei rekkje ulike inngangar og lesingar som gjer verka tilgjengelege utan å skulle gje eintydige svar. Dei tek òg opp tidlause og grunnleggande spørsmål.
Dei subtile, men like fullt kraftfulle teikningane til Mette Stausland balanserer på grensa mellom det stabile og det flyktige, det enkle og det komplekse. Komposisjonane hennar er prega av mønster, teksturar og flater, som saman hintar om terreng og større rom innover i bilda.
Mette Stausland (f. 1956, Kristiansand) har ei intuitiv tilnærming til komposisjon og motiv. Sjølv skildrar ho teikneprosessen som at ho «ladar papiret». Om vi ser nøye etter, kan vi i fleire av verka sjå korleis ho legg til og trekker frå ved å teikne og viske ut. Stausland bur og jobbar i Danmark.
Uten tittel av Wendimagegn Belete er eit resultat av ein intuitiv måleprosess der vi kan sjå spor etter store bevegelsar, kraftige fargar og kontrastar. Komposisjonen er fylt av ein myriade av teikn og symbol, figurar og abstrakte former som skaper ei fleirstemt forteljing.
Wendimagegn Belete (f. 1986, Etiopia) jobbar på tvers av kunstnariske medium som video, måleri, fotografi, tekst og funne materiale. Belete målar energiske og detaljerte bilde inspirerte av etiopisk kultur før og no, og er særleg opptatt av korleis minne blir overførte frå generasjon til generasjon. Gjennom kunsten sin oppfordrar han tilskodaren til å sjå sin eigen kulturelle og personlege identitet som ei samling av tidlegare erfaringar. Belete har ein mastergrad frå Kunstakademiet i Tromsø, og bur og jobbar i Oslo og Addis Abeba.
Untitled er ein rytmisk abstrakt komposisjon kor asymmetriske kvite former svever framfor fargefelt som glir over i kvarandre. Den fargesterke bakgrunnen gir bildet eit forførarisk preg, men dei intenst raude partia kan også verke konfronterande.
Måleria til Herman Mbamba (f. 1980, Gibeon, Namibia) er ein personleg og politisk arena kor barrierar mellom situasjonar, refleksjonar, opplevingar og sanseinntrykk blir brotne ned til sjølvstendige subjektive erfaringar. Mbamba bruker farge og komposisjon på ein måte som kombinerer harmonisk samhandling og ei meir motsetningsfylt og fleirtydig tilnærming til måleriet og tradisjonane det ber på. Herman Mbamba er utdanna ved Kunstakademiet i Oslo, og bur og jobbar i Haugesund.
