Helga-Marie Nordby kjem til KORO med solid kunstfagleg bakgrunn. Ho er utdanna kurator frå Goldsmiths College i London og har studert kunsthistorie på Universitetet i Oslo. Tidlegare har ho mellom anna vore leiar for Unge Kunstneres Samfund i Oslo, og instituttleiar ved Kunstakademiet i Tromsø, UiT Noregs arktiske universitet.

– Vi er veldig glade for at Helga-Marie Nordby har takka ja til kuratorstillinga hos oss! Ho kjem med brei erfaring frå kunstfeltet, og ein kuratorpraksis som omfattar fleire kunstprosjekt i offentlege rom. Ho vil mellom anna bli ein del av kuratorteamet som skal utvikle kunstprosjekta til det nye regjeringskvartalet i Oslo, seier leiar av kunstseksjonen Nora Ceciliedatter Nerdrum.

Nordby er engasjert som ein av kunstkonsulentane for det nye Ibsenbiblioteket i Skien, og ho var kunstkonsulent for Oslo kommune til det nye Tøyenbadet som opna i januar 2025. Tidlegare kuratorerfaring for KORO er kunstprosjekta ved Politihuset i Tromsø og Sunnaas Sjukehus. Nordby har saman med den norske kunstnaren Crispin Gurholt, bygd opp og driv Kunstrum Fyn i Danmark. I tillegg utgjer ho ein del av kuratorgruppa til MAĐĐI – Romsa Dáiddahálla.

– Eg ser fram til å samarbeida med dyktige kunstnarar på spennande og utfordrande kunstprosjekt i offentlege rom. Eg gler meg også til å få gode og inspirerande kollegaer og bli ein del av eit sterkt fagmiljø, seier Nordby.

Det var 53 søkarar til kuratorstillinga, som er eit åremål på fire år. Nordby tiltrer fulltid i stillinga frå august 2025, men er på plass deltid i KORO allereie frå slutten av april.