Boklansering med Jumana Manna på Kunstnernes Hus

Jumana Manna si bok Stone Assemblies blir lansert på Kunstnernes Hus fredag 16. oktober. Med Manna sitt kunstverk Sebastia som eit sentralt utgangspunkt, utforskar boka ruinar, motstand og politikken til steinen.

Stone Assemblies er eit initiativ som vart utvikla av Jumana Manna i samband med produksjonen av kunstverket Sebastia. Bygolvet, som det ofte blir referert til, er eit 800 kvadratmeter stort kunstverk laga av resirkulert stein frå heile Noreg. Det vart utforma spesielt for det nye regjeringskvartalet i Oslo på oppdrag frå KORO.

Boka Stone Assemblies samlar stemmer som utforskar politikken, ruinane og motstanden til steinen. Med utgangspunkt i politiske og kulturelle historier om utvinning av ressursar, og kampen om land i Palestina og Noreg, bevegar boka seg ut over geografiske område og løfter fram praksisar forma av diasporiske erfaringar og urfolkstradisjonar.

Tekstane, dikta, kunstverka og samtalane i boka reflekterer over det som står igjen og det som kan setjast saman på nytt i leitinga etter kritiske perspektiv om ressursutvinning og antikoloniale former for kunst og fellesskap.

Programmet på boklanseringa inkluderer ein panelsamtale med Jumana Manna, forfattar og kurator Rana Issa, seniorkurator i KORO Drew Snyder, lærar og samfunnsdebattant Mohamed Abdi og forskar og poet Wendy Lotterman. Samtalen blir følgd av ein konsert med poeten og teoretikaren Fred Moten og komponisten og bassisten Brandon Lopez, som skaper kraftig musikk for ei verd i krise.